Miðstöð munnlegrar sögu tók til starfa 26. janúar 2007. Miðstöðin er safn og rannsókna- og fræðslustofnun á sviði munnlegrar sögu. Hlutverk hennar er að safna munnlegum heimildum um sögu lands og þjóðar og varðveita þær til frambúðar. Miðstöðin leitast við að gera safnkostinn aðgengilegan með því að yfirfæra hann á stafrænt form og miðla honum á vefsíðu sinni. Í miðstöðinni er aðstaða til að hlusta á hljóð- og myndefni.

Miðstöðinni er ætlað að efla munnlega sögu sem aðferð í sagnfræði. Hún mun veita fræðslu um söfnun og notkun munnlegra heimilda, skapa fræðimönnum aðstöðu til rannsókna og standa fyrir fræðilegri umræðu um munnlega sögu. Miðstöð munnlegrar sögu er samstarfsvettvangur fjögurra aðila: Sagnfræðistofnunar Háskóla Íslands, Rannsóknastofu í kvenna- og kynjafræðum við Háskóla Íslands (RIKK) og Kennaraháskóla Íslands í samvinnu við Landsbókasafn Íslands - Háskólabókasafn. 

Aðsetur Miðstöðvarinnar er á fjórðu hæð í Landsbókasafni Íslands - Háskólabókasafni og er hún opin alla virka daga frá kl. 13.00 til kl. 16.00. Frekari upplýsingar veitir Eiríkur Valdimarsson, í síma 525 5775. Einnig er hægt að senda tölvupóst á netfangið munnlegsaga@munnlegsaga.is

Póstfang miðstöðvarinnar er:
    Miðstöð munnlegrar sögu
Landsbókasafni Íslands - Háskólabókasafni 
 Arngrímsgötu 3
    107 Reykjavík